ده مش عنوان نشره او برنامج اخبارى .. ده مجرد سرد لبعض الحاجات اللى حصلت ليا الاسبوع ده وكسلت اكتبهم فى ساعتها.. كنت ناوى اكتب كل حاجه فى موضوع لوحدها.. بس نحطهم كلهم مع بعض بالمختصر المفيدعشان اريح ليا
اولا.. شكر واجب
احب اشكر الفنان خالد الصاوى على زيارته للبلوج بتاعى ورده على تعليقى على فيلم الجزيره.. طبعا الموضوع ده انا كاتبه من زماان.. والرد بتاع خالد كان من زمان برضه.. تقريبا فى شهر ديسمبر اللى فات بس انا مسطول ومختش بالى نظرا لانى كنت كتبت بعد الجزيره موضوعين كمان فمخدتش بالى ان فيه ردود تانيه على نقدى للفيلم.. طبعا بالصدفه البحته اكتشفت رد خالد الصاوى عندى الاسبوع ده وكنت فرحان بيه جدا.. مكنتش متخيل انه حد من الفنانين هيهتم انه يبص على نقد من واحد عادى.. لا وكمان يرد بشكر عليه
بصراحه انا افتكرت فى الاول انها اشتغاله من واحد صاحبى.. لكن دخلت على اللينك لقيتها فعلا مدونه الفنان خالد الصاوى .. وعلى فكره مدونه جميله جدا .. وخالد بيكتب كلام حلو فى كل حاجه وله اشعار كويسه.. وطبعا المعجبين اللى بيخشو المدونه بالعبيط.. انا حطيت لينك مدونته عندى فى عقول اخرى
ثانيا.. الحمد لله انى خلصت من امتحان الكوميونتى بتاع اعمال السنه.. ربنا يسترها بقا علينا فى بقيت المواد لسه امتحان اخر الراوند بتاع الاى ان تى .. ربنا معانا
ثالثا
انا لسه متفرج ناو على مطش الاهلى والزمالك القمه رقم مش عارف ايه.. المطش كان نص نص.. الاهلى مسك فترات والزمالك فترات
الاهلى كان بيلعب بثقه والزمالك بحماس.. والحماس جاب غلطتين فى الدفاع بجونين.. وطبعا الاهلى ايز كسب..وبقا الدورى للمره الرابعه ع التوازى مضمون بنسبه 99 و99999999 فى الميه
مبروك للاهلى وطظ ..قصدى هارد لاك للزمالك
رابعا
حمله عمرو خالد لمكافحه المخدرات والادمان.. طبعا ده الموضوع الاهم.. انا سمعت عن الحمله دى من ايام ما كان عمرو خالد ناوى عليها بجد بحترم فى عمرو خالد اسلوبه وطريقته للدعوه والنهضه بالامه واختياره للمواضيع اللى يساعد فيها ويجتهد فيها ويلم الشباب عشان يساعدو وينمو فيها..طبعا المخدرات والادمان دى مصيبه سودا بتهد اى شعب واى مجتمع وللاسف منتشره عندنا بغباء..على راى اللمبى المشكله دى مش ف مصرابسلولتلى المشكله دى عالميه فى العتبه والديزه وعابدين واحنا يا نوفر مكان للاطفال دى يا نوفرلهم الكوله
اعتقد اننا كلنا المفروض نساهم فى الحمله دى.. انا هتكلم عليها بالتفصيل بعدين لما اعرف عنها تفاصيل اكتر ومعلومات اكيده
8 قولى رايك فى الحوار ده..:
يا بختك يا سيدي
بختى بايه يا علوه؟؟
ايه ياعمونا ده كلو
كل الحاجات دى حصلت وانا اعده كده مش دريانه بحاجه وباكل جزر
انا لو منك كنت زهقت من كتر المشغوليات دى كلها
Gameel Awy ya 3amr el post da. Same7ny ana 3andy moshkela fe ketabet el 3araby 3ala el keyboard, i'm better with English. Wish u the best of luck with ur coming exam, bye.
بوست خفيف وظريف
اول زيارة وان شاء الله تتكرر
وشكرا لزيارتك ليا
وربنا معاك
ويارب يكتب للحملة النجاح لو عايز تعرف معلومات اكتر عنها
ادخل علي موقع مصطفي حسني او عمروخالد بس في الغالب مصطفي حسني احسن علشان عمرو خالد تقيل قوي كلة بانرات
يلا اتمني تدواوم الزيارة عندي وشكرا علي تعليقك
سلام
شكرا هووب على زيارتك واتمنى انها ماتكونش اخر زياره
ياعم ياااااعم
شكرا على الزياره والرد يا اللى مفقوعه مرارتك
على فكره انا دكتور..مشروع دكتور .. انا ممكن اعالج المراره مجانا.. بس 50000000 جنيه
Post a Comment