المولد النبوى الشريف

ولد الهدى فالكائنات ضياء .-~*'¨¯¨'*·~-. وفم الزمان تبسم وثناء

كل عام والامه الاسلاميه كلها بخير

النهارده المولد النبوى الشريف.. اتمنى انه يكون اكتر من مجرد احتفال
اتمنى انه يكون تذكره لينا كلنا -وانا قبل منكو- باتباع سنه الرسول صلى الله عليه وسلم.. والرجوع للطريق المستقيم قولا وعملا





قال رسول الله صلى الله عليه وسلم:- تركت فيكم ما ان تمسكتم به لن تضلوا بعدى ابدا.. كتاب الله وسنتى





اللهم اهدنا الى طريق الحق والهدى والصواب.. اللهم اغفر لى ولكل المسلمين فى هذا اليوم.. اللهم انصر امه نبيك.. برحمتك يا ارحم الراحمين..اللهم امين





على الهامش.. النهارده يوم عيد ميلادى الهجرى.. يوم ما اتولدت ميلادى كان موافق المولد النبوى.. انا ماوعاش.. هما اللى حاكولى

حدث فى هذا الاسبوع

ده مش عنوان نشره او برنامج اخبارى .. ده مجرد سرد لبعض الحاجات اللى حصلت ليا الاسبوع ده وكسلت اكتبهم فى ساعتها.. كنت ناوى اكتب كل حاجه فى موضوع لوحدها.. بس نحطهم كلهم مع بعض بالمختصر المفيدعشان اريح ليا

اولا.. شكر واجب

احب اشكر الفنان خالد الصاوى على زيارته للبلوج بتاعى ورده على تعليقى على فيلم الجزيره.. طبعا الموضوع ده انا كاتبه من زماان.. والرد بتاع خالد كان من زمان برضه.. تقريبا فى شهر ديسمبر اللى فات بس انا مسطول ومختش بالى نظرا لانى كنت كتبت بعد الجزيره موضوعين كمان فمخدتش بالى ان فيه ردود تانيه على نقدى للفيلم.. طبعا بالصدفه البحته اكتشفت رد خالد الصاوى عندى الاسبوع ده وكنت فرحان بيه جدا.. مكنتش متخيل انه حد من الفنانين هيهتم انه يبص على نقد من واحد عادى.. لا وكمان يرد بشكر عليه

بصراحه انا افتكرت فى الاول انها اشتغاله من واحد صاحبى.. لكن دخلت على اللينك لقيتها فعلا مدونه الفنان خالد الصاوى .. وعلى فكره مدونه جميله جدا .. وخالد بيكتب كلام حلو فى كل حاجه وله اشعار كويسه.. وطبعا المعجبين اللى بيخشو المدونه بالعبيط.. انا حطيت لينك مدونته عندى فى عقول اخرى

ثانيا.. الحمد لله انى خلصت من امتحان الكوميونتى بتاع اعمال السنه.. ربنا يسترها بقا علينا فى بقيت المواد لسه امتحان اخر الراوند بتاع الاى ان تى .. ربنا معانا

ثالثا

انا لسه متفرج ناو على مطش الاهلى والزمالك القمه رقم مش عارف ايه.. المطش كان نص نص.. الاهلى مسك فترات والزمالك فترات

الاهلى كان بيلعب بثقه والزمالك بحماس.. والحماس جاب غلطتين فى الدفاع بجونين.. وطبعا الاهلى ايز كسب..وبقا الدورى للمره الرابعه ع التوازى مضمون بنسبه 99 و99999999 فى الميه

مبروك للاهلى وطظ ..قصدى هارد لاك للزمالك

رابعا

حمله عمرو خالد لمكافحه المخدرات والادمان.. طبعا ده الموضوع الاهم.. انا سمعت عن الحمله دى من ايام ما كان عمرو خالد ناوى عليها بجد بحترم فى عمرو خالد اسلوبه وطريقته للدعوه والنهضه بالامه واختياره للمواضيع اللى يساعد فيها ويجتهد فيها ويلم الشباب عشان يساعدو وينمو فيها..طبعا المخدرات والادمان دى مصيبه سودا بتهد اى شعب واى مجتمع وللاسف منتشره عندنا بغباء..على راى اللمبى المشكله دى مش ف مصرابسلولتلى المشكله دى عالميه فى العتبه والديزه وعابدين واحنا يا نوفر مكان للاطفال دى يا نوفرلهم الكوله

اعتقد اننا كلنا المفروض نساهم فى الحمله دى.. انا هتكلم عليها بالتفصيل بعدين لما اعرف عنها تفاصيل اكتر ومعلومات اكيده

مووش عارف ايه العنوان؟؟

ما بين بعدك و شوقي اليك
وبين قربي و خوفي عليك
تغيب عني و ليلي يطول
وفكري بهواك مشغول
دليلي معاك احتار
لا انا فالجنه ولا في النار
حبيبي..
كل منايا اعيش بين ايديك
واشوف الحب فنظره عينيك
لكن دموع قلبي هانت عليك
وانا مشتاق لنظره من عينيك
عايش وحدك ولا سائل فيا
ولا حتي شايف دمعة عينيا
يا ترى قلبك مش حاسس بيا?
ولا انت بتتقل عليا?
حبيبي..
رد عليا متسبنيش في نار
انا مش قادر علي جحيم الانتظار
انا تايه في بحورك وحبك هو الفنار

دى حاجه من كتاباتى كنت كاتبها زماااان اوى.. انا معرفش اذا كانت حلوه ولا وحشه وحاسس ان اسلوبها ضعيف.. بس عموما قلت احطها عشان من بنات افكارى.. وانا فعلا معرفش احطلها ايه عنوان