Thursday, December 27, 2007

باى 2007..هاى 2008


سلامو عليكوووووو

مع قرب انتهاء سنه 2007 فاضل حوالى 4 او 3 ايام وتبقا السنه اللى فاتت
نقولها باى باى.. ونقول للسنه الجديده هاى هاى
واضح ان ده احد الاقوال الماثوره لام عبده


سيبك من ام عبده.. وخليك فى المهم..ايه اللى حصل فى السنه دى 2007 يهمك اوى... ايه اكتر حاجه ندمت انك عملتها..ايه اكتر حاجه زعلت انك ماقدرتش تعملها
ايه اكتر حاجه زعلتك فيها... وايه اكتر حاجه حصلت فيها فرحتك؟؟؟؟
اسئله كتير لازم ناخد بالنا منها كل سنه..مش كل سنه.. كل يوم.. المفروض اننا نحاسب نفسنا كل يوم ونشوف ايه الصح اللى عملناه.. ونستمر فيه وايه الغلط عشان ما نقعش فيه تانى
معتقدش اننا المفروض نسيب السنه تعدى وسنه تانيه تيجى وخلاص..وما بنستفدش حاجه من عمرنا اللى بيعدى
احنا كلنا هنتحاسب ادام ربنا على عمرنا..عملنا فيه ايه.. ضاع.. ولا استفدنا بيه
عشان كده المفروض كلنا نحاسب نفسنا اول باول.. ربنا يهدينى واعمل كده والتزم طريقه المستقيم

اكيد فى حاجات حصلت لينا فى 2007 احنا مستغربين انها حصلت لينا.. وبنقول ليه كده..بس اعتقد اننا المفروض نفكر فيها تانى من زاويه تانيه.. اكيد اللى حصل ده كان لصالحنا.. للخير لنا

وعشان كده المفروض نحاول بقدر الامكان اننا نخلى كل يوم بيعدى علينا بيكون احسن فى رصيدنا فى حياتنا واحسن فى رصيدنا للاخره

اهم حاجه ان ربنا يوفقنا فى حياتنا ويهيدينا لاختيار الحاجه الصح والقرارات الصح فى حياتنا


عن نفسى..فى 2007 خلصت تالته طب .. وده انجااااااز رائع..يساوى وصول الانسان للقمر عشان الحمد لله خلصنا من المواد المقرفه دى.. ودخلنا اللى اوحش منها مليون مره..فى رابعه طب
اكتر حاجه فرحتى فى السنه دى انى اتميت العشرين ربيعا من عمرى وانى الحمد لله خدت قرار مصيرى فى حياتى الخاصه والكونكشن بتاعى..كنت فاكر انى بالقرار ده هضيع...بس اتضح انه احسن ليا..الحمد لله

اكتر حاجه ندمت انى معملتهاش.. انى مازكرتش ميكرو كويس.. كان زمانى جايب امتياز وريحت دماغى من الصداع بتاع كل سنه ...انت ما بتزاكش...انت فاشل.. انت..انت... الاسطوانه المشروخه دى

اكتر حاجه فعلا فعلا زعلتنى.. وفاه اتنين من قرايبى.. خالى .. وواحد تانى قريبنا
الاتنين كنت بحبهم اوى وبعزهم جدا..الله يرحمهم ويسكنهم فسيح جناته
بقا.. ايه نظام 2007 و 2008 معاكو..(لو كان فيه حد ناوى يكتب

نيجى بقا للحوار التانى.. ايه اكتر حاجه نفسك تعملها فى 2008؟

يارب السنه دى تكون خير علينا كلنا

اولا السنه دى هتم فيها 21 سنه.. وده شئ لذيذ خالص... ومحدش يقولى ليه
ثانيا.. اتمنى ان سنه رابعه طب تخلص فيها على خير
ثالثا.. اتمنى انى اعيشها انا واهلى واصحابى.. فى سعاده وفرح.. وبصحه كويسه

انتو بقا..ايه نظام 2007 و 2008 معاكو.. (لو فيه حد ناوى يكتب كومنت يعنى) ؟؟

8 قولى رايك فى الحوار ده..:

أنا said...

بص يا عمرو

البوست جميل أوى و فعلا الواحد المفروض يقدم لنفسه كشف حساب بالى بيعمله أول بأول .

أولاّ الحاجات الى بسطتنى فى 2007:
1- أكتشفت فى نفسى أماكن مضلمة عمرى مادخلتها قبل كده
2- أهتمامى بالكتابة و الأدب و تنمية حسى الفنى
3- نظرة أعمق للأمور

ثانياً الى خنقنى :
1- ذى ماكتشفت ؛اجات جوايا ....حاجات قصدها ضاعت .
2- طلعت بمادة لأول مرة ف حياتى
3- خسرت ناس -و مازلت أخسرهم _ كنت بحبهم و بقالهم كتير معايا بس ده نتيجة لتغيرى.....مش عارفة ده حلو و لا ايه ...بس أنا حاسة أنه خير ليا ...

2008 لسة مافكرتش الصراحة

amraction said...

مش مهم الواحد خسر ايه..طالما ان ده فى صالحه..اهم حاجه يعرف الطريق الصح فين ويمشى فيه
ربنا يوفقنا للخير كلنا
وتبقا 2007 سنه عدت على خير
و 2008 سنه كلها خير

Anonymous said...

والله هو النسبان نعمه من ربنا يعنى ربنا يكمنا كده ونقدر ننسى الحاجات الحزينه واللحظات المريره من عمرنا فا مش لازم نفتكر احنا عملنا ايه السنه اللى فاتت بس واللهمن اسعد اللحظات اللى كانت على الواحد انه نجح السنه اللىفاتت فى الكليه ودا كان امر يكاد يكون مستحيل فى ظل الظروف الى كانت فى الكليه (( التصحيح زفت والامتحانات كانت الدكاتره بتنتقم منا فيها ))بس الحمد لله رنا نجانا وزى ما نات عارف يا عمووووووور ان ((رمضان مختلف))ومش ها علق اكتر من كده واظن السنه دى احنا كنا فيها مع بعض ودى حاجه حلوه اما بأه 2008 ربنا يستر انا هابدأها بأمتحانات فى مواد مش عارف فيها حاجه خالص ادعولى ربنا ينجحنى وشكرااا
وزى ما بيقولوا اول القصيده........((رنا يستر))...........

alialmahroki said...

اجمل ما في 2007 اني حفظت 11 جزء من القران الكريم......الاسوأ حاجات كتيرة مش لازم اكتبها لانها وحشة بغباء

Anonymous said...

بقالى 20 سنة على وجه الكرة الارضيه عمري ما فكرت بصراحه افتكر في اي سنه تعدى لا حلو ولا وحش بس مش عارفه ليه لما قريت كلامك يا عمرو حسيت اني عايزة افتكر فعلا
بص يا سيدي اول حاجه حلوة حصلت في 2007
انى رحت رحلة اسكندرية كان بقالي 10 سنين مشفتش البحر الحاجه التانية اني ادربت في مكان تحفة لمدة شهر رحت القرية الذكية طبعا اللي مش في شرم الشيخ اللي ف الكيلو 28 طريق مصر اسكندرية كان احلي شهر في حياتى كلها حاجه جامدة فعلا هو ده الشغل اللي علي حق ربناحاجه حلو ة تانية خدت كورس مهم جدا هو اي نعم كانت في فترة صعبة بس نفعني اوي حاجه تانية ناس معينه كنت فاكراهم اصحابي اوي عرفتهم علي حقيقتهم فبعدت عنهم يالا حصل خير علي فكرة انا بعتبر دي حاجه حلوة احسن من الخداع
نجي للحاجات الوحشة اول حاجه لاول مرة في حياتي اجيب في مادة 7 من عشرين هيا اترفعت الحمدلله بس بعد دمي ما نشف كان شكلها لذيذ جنب المادتين التانين اصلهم كانوا امتياز منه لله اللي كان السبب انا مش قادرة افتكر فعلا غير الحاجات الحلوة كويس الني نسيت الوحش

ftafeet said...

عارف ياعمرو بجد السنه دى معملتش فيها اى حاجه بالعكس فقدت ناس كتير بحبهم ومعملتش اى حاجه مفيده بس ان شاء الله ناويه انى اغير الموضوع ده السنه الجايه باذن الله يعنى مش هافضل كده كتير

كل سنه وانت طيب ياعمرو ويارب اشوفك دكتور اد الدنيا

اختك فتفوته

Anonymous said...

ايه يابني دا ايه لي انت بتفكر فيه دا ه
يعم اقضيها هو حد واخد منها حاجه اليوم بيومه يا عم عمرو
فكك بقي من جو الشؤم دا دور علي الي يفرحك مش الي يخليك تتضايق من نفسك
يعم عيش وارضاااااااااااااااا
وبصراحه متندمش علي حاجه معملتهاش لانك لو كنت حتعملها كنت حتتخنق انك عملتها
سيبك انت ومتفكرش في الي عدا علي راي المثل :
فكك وبص لبكره بكره اوسخ من النهارده
ولا يهزك شيء في اوم المتيله الي اسمها الدنيا دي
يديئك ميديئكش اهوا الواحد عايش والاسلاااااااااااااام

amraction said...

سياتك مين؟