كل سنه وانتو طيبين

يا رب تكون سنه جميله علينا كلنا

باى 2007..هاى 2008

سلامو عليكوووووو

مع قرب انتهاء سنه 2007 فاضل حوالى 4 او 3 ايام وتبقا السنه اللى فاتت

نقولها باى باى.. ونقول للسنه الجديده هاى هاى
واضح ان ده احد الاقوال الماثوره لام عبده


سيبك من ام عبده.. وخليك فى المهم..ايه اللى حصل فى السنه دى 2007 يهمك اوى... ايه اكتر حاجه ندمت انك عملتها..ايه اكتر حاجه زعلت انك ماقدرتش تعملها
ايه اكتر حاجه زعلتك فيها... وايه اكتر حاجه حصلت فيها فرحتك؟؟؟؟
اسئله كتير لازم ناخد بالنا منها كل سنه..مش كل سنه.. كل يوم.. المفروض اننا نحاسب نفسنا كل يوم ونشوف ايه الصح اللى عملناه.. ونستمر فيه وايه الغلط عشان ما نقعش فيه تانى
معتقدش اننا المفروض نسيب السنه تعدى وسنه تانيه تيجى وخلاص..وما بنستفدش حاجه من عمرنا اللى بيعدى

احنا كلنا هنتحاسب ادام ربنا على عمرنا..عملنا فيه ايه.. ضاع.. ولا استفدنا بيه

عشان كده المفروض كلنا نحاسب نفسنا اول باول.. ربنا يهدينى واعمل كده والتزم طريقه المستقيم

اكيد فى حاجات حصلت لينا فى 2007 احنا مستغربين انها حصلت لينا.. وبنقول ليه كده..بس اعتقد اننا المفروض نفكر فيها تانى من زاويه تانيه.. اكيد اللى حصل ده كان لصالحنا.. للخير لنا

وعشان كده المفروض نحاول بقدر الامكان اننا نخلى كل يوم بيعدى علينا بيكون احسن فى رصيدنا فى حياتنا واحسن فى رصيدنا للاخره

اهم حاجه ان ربنا يوفقنا فى حياتنا ويهيدينا لاختيار الحاجه الصح والقرارات الصح فى حياتنا

عن نفسى..فى 2007 خلصت تالته طب .. وده انجااااااز رائع..يساوى وصول الانسان للقمر عشان الحمد لله خلصنا من المواد المقرفه دى.. ودخلنا اللى اوحش منها مليون مره..فى رابعه طب
اكتر حاجه فرحتى فى السنه دى انى اتميت العشرين ربيعا من عمرى وانى الحمد لله خدت قرار مصيرى فى حياتى الخاصه والكونكشن بتاعى..كنت فاكر انى بالقرار ده هضيع...بس اتضح انه احسن ليا..الحمد لله

اكتر حاجه ندمت انى معملتهاش.. انى مازكرتش ميكرو كويس.. كان زمانى جايب امتياز وريحت دماغى من الصداع بتاع كل سنه ...انت ما بتزاكش...انت فاشل.. انت..انت... الاسطوانه المشروخه دى

اكتر حاجه فعلا فعلا زعلتنى.. وفاه اتنين من قرايبى.. خالى .. وواحد تانى قريبنا
الاتنين كنت بحبهم اوى وبعزهم جدا..الله يرحمهم ويسكنهم فسيح جناته
بقا.. ايه نظام 2007 و 2008 معاكو..(لو كان فيه حد ناوى يكتب

نيجى بقا للحوار التانى.. ايه اكتر حاجه نفسك تعملها فى 2008؟

يارب السنه دى تكون خير علينا كلنا

اولا السنه دى هتم فيها 21 سنه.. وده شئ لذيذ خالص... ومحدش يقولى ليه
ثانيا.. اتمنى ان سنه رابعه طب تخلص فيها على خير
ثالثا.. اتمنى انى اعيشها انا واهلى واصحابى.. فى سعاده وفرح.. وبصحه كويسه

انتو بقا..ايه نظام 2007 و 2008 معاكو.. (لو فيه حد ناوى يكتب كومنت يعنى) ؟؟

Thanks Arjon....شكرا عرجون

THANKS ARJON..

صوره لجماهير النجم فى اليابان

NO COMMENT

لماذا احببتك..؟؟

لماذا سمحت لنفسى بان احبك

لماذا داعبتى قلبى لماذا صرختى وقولتى بحبك

لماذا احببتك
لا لانك اجمل ما يكون

لا لانك الوحيدة التى انفطر لها قلبى

لا لانك ما عشت احلم بيه

لا لانك من عرف طريق قلبى
وانتى تعلمى انى اغلقت قلبى..لماذا طرقتى بابى
لقد اخبرتك الا تفعلى..فصرتى تطرقى قلبى
ولم اتخيل انى ضعيف كنت احسب انى اقوى من هذا

كنت احسب ان بأستطاعتى الاستمرار وهو مغلق
وانفتح باب قلبى وبعد عطش ارتوى
وقذفت بكل ما املك من مشاعرورايت سعادة قلبى فى عينيكى الجميلتين
وعشت اجمل ايام

ويا ليت ظلت عينيكى جميلتين

ويا ليت الايام سارت سنين
ويا ليتنى لم أفتح قلبى
فا لو ظل مغلقا من بداية لا كان اهون من ان يكسر

كان اهون من ان ينجرح
كم تعلمت منك الكثير

كم تعلمت ان مفتاح قلبى لن يأخذه الا من يستحقه
كم سيظل قلبى بعدك عطشان
ولكن هذا اهون له كثير من ماءك المسموم

ده موش شعرى..قريته فى منتدى وعجبنى فنقلته هنا

رؤيه نقديه..فيلم الجزيره

سلامو عليكووووو

طووووول عمرى بنقرف من الافلام العربى..بجد افلام زباله..تمثيل ردئ ومؤثرات صوتيه وضويئه اقل من اللى موجوده فى عالم سمسم

ودى اسباب لوحدها كفايه جدا عشان اكره اى فيلم عربى..ما عدا بعض الافلام اللى تفلت من الحوار المعفن ده

كان من ضمن الافلام اللى فعلا هتخش التاريخ السينمائى من اوسع بواباته ..فيلم الجزيره

الفيلم بدا عرضه فى العيد من بطوله احمد السقا و محمود يس وهند صبرى وزينه وخالد الصاوى ومحمود عبد المغنى

اولا.. الفيلم ده فعلا يستحق كل قرش من العشره جنيه اللى اندفعت فيه

ثانيا..نتكلم عن الفيلم بقا

الفيلم بيحكى عن قصه واقعيه حصلت فى الصعيد من خلال حبكه(حلوه حبكه دى..نشره الساعه تسعه جابت نتيجه) حبكه سينمائيه جميله

القصه للى مخدش باله لما شاف الفيلم..هيا قصه قريه النخيله بتاعت الصعيد الى كانت كل الدنيا بتتكلم عن العصابه الجباره اللى كانت مسيطره عليها لسنين طويله وكمان بيبن ان فساد بعض الناس اللى فى الشرطه وانا بقول بعض عشان انا عارف شخصيا شخصيات كتير جدا فى الشرطه ومحترمه بغباء..المهم بيبن ان فساد الشرطه هو العامل الرئيسى ورا وجود العصابات الكبيره دى واللى كانت السبب الرئيسى فى ظهور بعض الاساطير الاجراميه زى حى الباطنيه فى القاهره زمان..وقريه النخيله من كام سنه والحمد لله انها خلصت السنه اللى فاتت

الفيلم فعلا جبار جبار جبار..اللى كتب السيناريو بجد يستاهل جايزه الجولدن جلوب فى الحوار ده لان الجمل صغيره ومفيده ومفيهاش تلاكيك كتير ولت وعجن ع الفاضى

اول مره يكون فيه فيلم مصرى عن قصه واقعيه ويبقا جميل جدا جدا بالشكل ده

مواقع التصوير خرافيه جدا

فكره الاستعانه بالعربيات المصفحه من وزاره الدخليه فكره جميله جدا بدل ما يجيبو فيات 128 ويدهنوها اسود ويحطوها على اساس انها مدرعه

التمثيل فى الفيلم كان فوق المستوى تماما

من راى يعنى...

احمد السقا يستاهل 7 من عشره السقا اثبت انه ممثل فعلا جامد..ادى شخصيه منصور باجاده تامه

محمود يس ..صعيدى صعيدى يعنى ياخد 7 من عشره برضه..كان ابو منصور..وعمل دوره رغم انه صغيره ببراعه تحس فعلا انه زعيم عصابه مخدرات..اجمل حاجه قالها لما قال هو انا بنبيع ولا بنزرع حاجه حرام..ده احنا بنزرع افيون بس

هند صبرى..دورها صغير.. بس السيناريو بتاعها وضح بسهوله انها كانت مؤثره جدا فى شخصيه منصور(احمد السقا يعنى) تستاهل 7 من عشره ودورها كان بيوضح غلطه احمد السقا فى انه مشى ورا حبه ونسى الكلام اللى قاله ابوه انه لو عايز يبقا الاقوى لازم يبعد عن عواطفه واى حاجه بيحبها

زينه..معرفش ايه لزمتها ف الفيلم

محمود عبد المغنى.. الواد ده لو ركز شويه وبطل برود اهله ده هيبقا ممثل عالمى..ياخد 6.5 وقايم بدور ظابط الوزاره باعتاها عشان يشوف حوار الجزيره ومنصور الذى لا يقهر وعمله ببرود حبتين..بس كان كويس

خالد الصاوى.. لو فيه جايزه اوسكار احسن ممثل مساعد كان خدها خالد الصاوى.. الممثل ده بيثبت مع كل دور بيعمله انه عبقريه فنيه المفروض تمثل فى هوليوود مش فى زعبليوود ياخد 9 على عشره عمل دور الظابط الفاسد الى مكنش عنده مانع انه يساعد المجرمين طالما انها مصلحته..اداه بنفس كفائه خالد صالح فى تيتو

باسم السمره..اللى عمل دور عم احمد السقا..ممثل كويس جدا جدا.. وكاان جبار باللهجه الصعيدى..دوره صغير بس مؤثر خالص

فيه بعض الكومبارس اللى كان دورهم جامد.. زى اخو منصور الاخرس (فضل)..اخرس اخرس يعنى.. ياخد 6 على عشره

واحد تانى طلع قال جمله واحده بس عجبتنى اوى...كان محمودعبد المغنى بيساله عن راى اهل الجزيره فى كبيرهم منصور فقاله لو كل تجار المخدرات بشهامه وطيبه منصور ياريت الناس كلها تبقا تجار مخدرات..مش الجمله بالظبط..بس ده معناها

المؤثرات الصوتيه تاخد 5 من عشره.. لانهم واخدنها تقريبا من فيلم امريكى ايام السبعينات بيحكى عن حرب

فييتنام...تسمع صوت رشاش طالع من مسدس... ورشاش بيضرب ميا مش رصاص..

الجرافيك..ظهر فى ضرب الصواريخ..وياريته ما ظهر ..لانه متاخد من توم وجيرى..كان ناقص يكتبو بوووم جنب الانفجارات

وعموما... الفيلم يستاهل 10 على 10 فى رايى المتواضع

اللى شاف الفيلم اعتقد انه معايا ان الفيلم ده جامد جدا.. واللى مشفش الفيلم انصحه انه يشوفه

سلاموووووووووووز

اصحاب انا وانت ولا ..؟؟

السلام عليكم..

كتير بقعد اسال نفسى يعنى ايه اصدقاء..يعنى ايه تقول على واحد ده صاحبى

تقريبا مفيش تعريف محدد عند اى حد..كله بيقول تعريف للصاحب حسب ما هو شايف صاحبه بيكون ايه

فى ناس عندها صاحبها يبقو الناس اللى بتخرج معاها وتهيص وتقضى ليله جميله وناس تانيه تقول لا..صاحبى اللى لما اعوز منه خدمه يعملها.(شغل مصالح يعنى) وناس تالته تقول...صاحبى اللى يبقا بينى وبينو حاجات مشتركه كتير..زى الدراسه ..نفس المكان اللى ساكنين فيه..الرياضه..يعنى البنى ادم اللى بتشوفه كل يوم عمال على بطال

وناس رابعه تقول صاحبى يبقا اللى فيه كل اللى فوق ده.. وزياده عليه يبقا زى اخويا تمام.. يعرف عنى كل حاجه ويدافع عنى فى غيبتى وكمان ما تهموش مصلحه من ورايا..

انا بقا من الصنف الاخير ده..ولو ان التعريف مثالى شويه.. بس على الاقل لما يبقا البنى ادم اللى بتقول عليه صاحبك فيه من الحاجات دى 80 فى الميه يبقا لووووووووز

انا شفت ناس كتير ينطبق عليهم الكلام ده.. بينهم وبين بعض.. يبقو الاتنين تقريبا عايشين مع بعض..وتبقا فعلا صداقه حقيقيه..

لكن للاسف النوع ده من الصداقه مش موجود كتير..وانا معشتوش الا فترات معينه من حياتى... كنت وقتها بحس ان صاحبى ده يستاهل كلمه انتيمى.. my best friend على راى اخوانا الانجليز

الناس هتقولى ..لا يا عمرو.. بطل كئابه يا اخى الصداقه الحقيقيه موجوده وكمان بالهبل وانت مش واخد بالك.. بس انت البس النضاره وانت تشوفها.. هقولهم حاضر.. هعمل عمليه تصحيح نظر كمان..واخد حبوب تفاؤل.. وبرضه انا متاكد من النتيجه, عشان انا عايشها.. بشوفها فى تعاملات الناس كل يوم..بشوفها فى تعامل ناس معايا بقول عليهم اصحابى..لكن هما ما وصلوش حتى لاربعين فى الميه من التعريف اللى قلت عليه

انا معرفش اذا كان فيه طريقه سحريه تخلى الناس تعاملك زى ما تحب طالما انك بتعمل معاهم كده,لكن اللى بشوفه هو العكس..بشوف ان الناس دايما بتطالبنى بكل حاجه كويسه معاها طالما اننا اصحاب.. واصحاب من زمااااااان اوى كمان ورغم كده ما يعملوش حاجه يثبتو بيها انهم اصحابك بجد

ممكن تكون مشكلتى انى بتعامل مع الناس غلط او بطيبه زياده عن اللزوم..او انى نحس ومالياش حظ مع اصحابى..المهم انى مووش عارف ايه المشكله بالظبط..وكمان معرفش اذا كانت مشكله معايا انا بس ولا بتقابل ناس كتير

اعتقد ان الموضوع ده فضفضه اكتر من انه راى فى الصداقه..بس المهم ان ده اللى جوايا بصراحه واللى حبيت اكتبه فعلا

سلامووز

الحب هو..

الحب عده صفات جميله جدا جدا جدا..على ما اعتقد ان كلها موجوده هنا فى الصور اللى انا جايبهالكو دى اتفرجو واحكمو بنفسكو

ولا انتو شايفين غير كده؟؟

كليه الطب.. شقاء بلا حدود

كليه الطب... كليه القمه..الكليه اللى الناس بتفحت نفسها فى الثانويه العامه مزاكره وفلوس ع الدروس.. ويروحو درس واتنين فى نفس الماده عشان خاطر عيون الطب..

انا معرفش ليه الطب فى مصر كليه القمه.. كان زمان(وزمان ده زمااااااااااااااااااااان اوى) كان الدكاتره ليهم هيبه فى المجتمع.. كان الدكتوريعنى.. طبيب..(بايخه)ما علينا..

كان الدكتور فعلا حاجه كبيره.. بنى ادم له قيمته.. الناس بتبصله باحترام شديد جدا على اعتبار انه من العلماء .. وانه كل هدفه فى الدنيا انه يبسط الناس ويخليهم يعيشو حياتهم بصحه كويسه ويقدرو يتمتعو بيها..

كمان الدكتور كان بيكسب جااااااااااااااااااامد من المهنه.. كان ليها قيمتها يعنى..لدرجه انهم زمان سموا الطب كليه 5 ع --وده يعنى عربيه عروسه عياده عماره عزبه-

حاليا لو قدر يجيب عين واحده من دول يبقا فااااااااجر وابن محظوظه

كان زمان الدكاتره بتتعلم تحت ايدين ناس بتفهم يعنى ايه طب.. يعنى ايه تخرج دكتور يقدر ينفع الناس وينفع نفسه..لكن دلوقتى كل اللى موجود اساتذه همهم الاول والاخير ازاى يجيبو الطلبه ع الحديده ويقرفوهم فى عيشتهم وما يدهمش علم ينفع ببصله..

ما علينا من الدكاتره..ولاد الك^%^%&..ولاد الاكابر..

نيجى بقا ليا.. واسباب دخولى الكليه العظيمه جدا..ذات الاهداف النبيله العليا..كليه الطب البشرى

اولا.. انا مكنش حلمى انى اخش الكليه دى ولا انى اطلع زفت نيله دكتور..انا كان نفسى اخش طيران.ايام ما كان عندى نظر..قبل ما البس العدسات الزجاجيه الاماميه للعين لتصحيح معامل الانكسار امام القرنيه وتعديل وضع الصوره(بالعربى يعنى النضاره) المهم..

كان قدرى انى اجيب مجموع يدخلنى طب..وكان ادامى اختيار بين طب وكليه عطاره(صيدله يعنى)وتجاره انجليزى..

انا بقا بذكائى الخارق جدا اخترت طب..

طب..حيث الامل والمستقبل المبهر..

طب..حيث العلوم السهله الواضحه والدكاتره المتعاونين

طب حيث الامتحانات السهله

طب..يعنى تتخرج تاخد 150 لحلوح..وااااااااااااااااااء..انا باخد اكتر منهم عشان اركب تاكسيات بس.

طب..يعنى سبع سنين راحو من عمرى فى كلام فاضى وكمان لسه سنه تكليف لو كان فيه يعنى وسنتين تلاته ماجستير..كل ده انا لسه مشتغلتش يعنى مكونتش نفسى ولا بنيت اى حاجه ف مستقبلى العكر

يعنى الشاب اللذيذ المراهق بيخش الكليه عنده 16 او 17 سنه يتخرج منها معقد نفسيا شعره طويل واهبل ولابس سماعه فى مناخيره و عنده 30 سنه عشان يبدا شغل.. ولسه يشوف الحياه الورديه ادامه هتبقا ازاى

طبعا كلكو عارفين الحياه دى عامله ازاى

شقه تمليك ف القاهره الجديده(الشقه من دول ب 2 مليون ونص )يا بلاش.واللى يغيظ انهم مخلصين حجز..يا ولاد الدزمه

عروسه بنت رجل اعمال(دجل وشعوذه يعنى)او بنت تاجر مخدرات او بنت كلب حتى..المهم انها انثى يطلق عليها عروسه وهتكون السبب فى خراب جيبك

عربيه بورش لو انت متواضع..مغرور شويه فيرارى..شايف نفسك يبقا لامبروجينى ليك..ولاندروفر للمدام (اللى هتخرب جيبك)وليموزين للاولاد عشان يروحو المدارس البريطانيه هناك

وما يمنعش بعد خمس سنين او سبعه يكون قدرت تبنى المستشفى بتاعتك.او تعمل كتب عن انجازاتك العلميه

وده طبعا قليل جدا يا جماعه..(حسبى الله ونعم الوكيل) ما علينا..ف الاخر احب اقول ان لو الزمن رجع بيا..قول للزمان ارجع يا زمان انا كنت اشتغلت رقاصه كان احسن

ربنا يعينا ونخلص الفتره اللى باقيالنا فى السجن الدولى لطلبه الطب..ونهج نروح كازخستان ولا موزامبيق يمكن نبنى حياتنا هناك