Saturday, January 3, 2009

ZAGAZIG...الزقازيق للابد




سلامو عليكو

الواحد بقالو كتير ما فتحش المدونه بتاعتو ولا بص على مدونات اصحابه مش عارف ليه.. بس تقريبا السبب انى مكنش فى دماغى اى افكار او اى حاجه خالص اتكلم عنها

بس النهارده الصبح.. بالصدفه لقيت ع الفيس بوك صور للمدينه اللزيزه اللى انا عايش فيها مدينه الزقازيق.. الصور عجبتى جدا.. لانها متخده لاماكن جميله ف الزقازيق كان الواحد تقريبا معدش شايف انها موجوده.. وكمان زوايا التصوير كانت حلوه اوى


انا عارف ان الزقازيق مش عاصمه النور او الضباب.. او حتى عاصمه الميا؟... وعارف انها لا عروسه ولا بنت خاله عروسه البحر الابيض المتوسط.. ولا ناس كتير فى مصر عارفينها...رغم انها من اكبر مدن وجه بحرى فى شرق الدلتا وكمان مركز حيوى(هيا عاصمه حاجه واحده بس محافظه الشرقيه)..يكفى ان فيها تالت او رابع اكبر جامعه فى مصر.. (كنا التالت بس بنها اعلنت الانفصال فى ثوره ديسمبر 2006 ومشو المندوب السامى الزقازيقى من عندهم ودمرو قواعد قوات الزقازيق اللى كانت محتله كوبرى بنها)ده غير ان محافظه الشرقيه انجبت شخصيات كتير جدا مشهوره ومعروفه.
مثلا..شخصيات غيرت تاريخ ومجرى الحياه فى مصر..احمد عرابى..طلعت حرب..السادات عاش واشتغل فتره فى الزقازيق ومنيا القمح
شخصيات فنيه.. عبد الحليم حافظ.. عمرو دياب..احمد زكى..يسرا
شخصيات فنيه برضه بس ملهاش لازمه دلال عبد العزيز..روجينا..شذا
شخصيات كرويه..عماد متعب واسامه حسنى ولاعيبه كتير ف الاهلى والاسماعيلى
شخصيات ارهابيه..ايمن الظواهرى من شارع فاروق فالزقازيق وعيلته كلها..ده غير ان الشرقيه فيها اكتر من نص اخوان مصر
شخصيات اتعمل منها اعمال ادبيه مرعبه لا تنسى عتريس وفؤاده فى شىئ من الخوف..قصه قريه الدهاشنه قرب بلبيس قصه حقيقيه فعلا.
تجد كل مايسرك عندنا.. دونت وورى..

وانا فعلا بحب الزقازيق جدا..اتولدت فيها.. وعشت فيها فتره من طفولتى المتشرده.. ولقيت فيها كل حاجه وعرفت فيها كل اصحابى

بس اكتر حاجه بتخلينى احب الزقازيق.. لما ابعد فتره واكون مسافر مده فى اى بلد تانيه.. لما برجع بتنفس الصعداء.. راجع ارض الوطن بقا.. بس لما برجع بستريح مش عشان هيا مدينتى وكده.. لا.. بستريح لانى بعرف قيمتها فى الغيبه دى
الزقازيق صغيره مساحه.. ماتجيش كلها اد مدينه نصر مثلا.. بس كبيره حيويا.. فيها كل حاجه .. مدارس.. مدارس خاصه.. مدارس اى جى ودولى.. جامعه.. وهيبنو جامعه خاصه قريب.. فيها محلات ومولات .. فيها مراكز تجمع شباب... الناس فيها مش فلاحين زى ما اى حد من القاهره ممكن يتخيل يعنى..بالعكس.. احنا عندنا الناس .. بالذات البنات ماشيين ع الموضه اوى.. بشكل متعب فعلا.. حتى لما كانت بتجيلنا فرق من الجامعات التانيه فى المسابقات مثلا كانو بينبهرو.. زى بالظبط الاجنبى لما بييجى مصر.. بيبقا عنده اعتقاد اننا شويه عرب سمر مربيين دقونهم ولابسين غتره وجلبايه وطربوش..(معرفش ازاى) وقاعدين فى خيم جنب الهرم وستاتنا لابسين كلهم زى فيفى عبده وبيرقصو.. وساعات بنفجر شويه قنابل.. بس لما يشوفو مصر بيصدمو انها دوله حضاريه وماشيه مع التاريخ


بس الاسباب دى مش اكتر حاجه بتخلينى احب الزقازيق.. يمكن اكتر السبب هو المواصلات.. الزقازيق متوسطه فى المساحه.. مش زحمه اوى.. (احيانا بتبقا ميدان التحرير) وفيها كل حاجه انت ممكن تحتاجها..يعنى تقدر تخلص مشاوير يومك كله فى ساعتين بالكتير.. (المشاوير كلها مش مشوار واحد)..مش زى كايرو يعنى.. عشان توصل اى حته بتقعد فترات طويله واكتر من مواصله
ده انت ممكن تلف الزقازيق كلها فى ساعتين فى تاكسى وتديله 5 جنيه(10 بعد ما الدنيا غليت) وتبقا كارمه كمان

عشان كده لما بسافر لاهلى فى كايرو او اسافر اليكس او اى حته وارجع تانى.. بحس بالفرق.. فى القاهره زحمه وقرف ومواصلات تخنق .. انت بتفتح باب التاكسى وتقفله فى كايرو تدفه 5 جنيه وتطلع ع القسم عشان ما تدفعش 5 كمان..

طبعا كل واحد بيحب بلده.. او المعظم.. بس لما شوفت صور الزقازيق قلت احطها هنا واكتب شويه عنها.. اسيبكو للصور بقا



























جامع الفتح وجزء من الكورنيش


جامع الفتح برضه.. على فكره ده بناه عبد الحليم حافظ

وسط البلد

جامع ابو خليل



وسط البلد بالكورنيش.. الجزء ده من الكورنيش بيكمل على شارع الكنايس ع البحر..فيه يمكن تلات او اربع كنايس كبيره جنب بعضهم

جامع الفتح.. بس مظاهره بقاالساعه..مهياش بيج بين ولا سمال بين حتى.. اهى ساعه فى محطه القطر وخلاص.. بس موجوده من زمانوسط البلد.. شارع الجناين وعمر افندى

تمثال طلعت حرب







الزقازيق ليلا
ميدان المحافظهجامع الفتح...تانىمجموعه من الاثار اللى موجوده فى بوبسطه ومعابد بسنت بصان الحجر

الزقازيق زمان..تقريبا سنه 1940..معرفش ازاى كانت فيه كاميرات اياميهم وكان فيه نت وكمبيوتر يشيله عليه الصور دى..الاولانيه معهد ازهرى.. والتانيه كنيسه مارى جرجس ع الكورنيش..فاضى حواليا.. بس ناو فيه مبانى وكنايس تانيه جنبها كتير.. معدش فيه خرم ابره فاضى جنبها
نادى احمد عرابىتمثال رمسيس بيه ادام الجامعه.. تقريبا كان فرعونالثانويه العسكريه.. من اقدم المدارس فى مصر.. من سنه 1902

بما انى مشروع دكتور..جزء من مستشفيات الجامعه.. كان فيه صوره كمان بس اتمسحت

كان فيه صور تانيه حلوه لاماكن تانيه فى الزقازيق.. زى ميدان القوميه تجمع الشباب الدائم والازلى..ومعرض ازياء البنات .. وصور جميله تانيه كتير.. بس انا زهقت من رفع الصور وكل شويه النت يقطع وحوارات كده.. دول كفايه

وعموما .. درس خغرافيا ممل شويه .. ومالوش علاقه باى حد تقريبا ممكن يدخل البلوج.. بس مش عارف حسيت انى عايز اعمل البوست ده وخلاص

كل سنه وانتم طيبين بمناسبه السنه الهجريه والميلاديه الجديده.. ويارب تبقا سنه فرح وسعاده لينا كلنا

6 قولى رايك فى الحوار ده..:

عمرو said...

أهلا عمرو. دي أول مرة أزور فيه مدونتك قريت كتير فيها.. اوعى تتخلى عن الكتابة... أوعى تقول ماكنش عندي أفكار. أنا زيك بس الأيام اللي فاتت لم انقطعت ورجعت حسيت نفسي بني آدم لمجرد إني باعبر عن رأيي

على فكرة الزقازيق حلوة قوي.. انت كده هاتشجعني أزورها. بس التاكسي عندكم كده يبقى غالي بالنسبة لسوهاج. هنا أكبر مشوار تدي فيه التاكسي 3جنيه.. تخيل

لما كنت في الجامعة أيام الصبا رحت معسكر إعداد القادة في حلوان, لفت نظري إن طلاب جامعة الزقازيق (زيكس) كانوا شباب جامدين قوي.. وكانوا في كل المسابقات بتحدوا بقية الجامعات. متهيألي شعب الزقازيق أحلى منها بكتير

أسما said...

Amr,

Welcome back. This is a wonderful post indeed. Your country is marvellous too. I didn't know it's that beautiful. I might visit it someday, who knows?!

Salam :D

kareem azmy said...

اول مرة ازور مدونتك
بس عاوز اقولك
ان مدينة الزقازيق ليها زكريات عندي كتيرة

هي المشاعر مختلطة
بس اعتقد اني بحبها

عندي صور كتيرة كمان ليها
لو حابب تشوفها

تحياتي

Anonymous said...

who am I ??
زقزق عصفور على باب بيتنا
والزقازيق دى مدنيتنا
بلعب فيها وبجى كمان
مالجامعه لحد الميدان
وكوبرى استانلى ياما شافنا
واحنا بناكل وانا جعان

حب الوطن ايمان حب الايمان اوطان من يوما حبيت انا حى اسلام ((حى السلام يا وطنى))

nano said...

مدونة جميلة وكلام جميل انا كنت بدور على صور للزقازيق ولقيت مدونتك وقريتها وعجبتنى جدا وعلى طول عملت حساب هنا وان شاء الله اقرالك حاجات تانية تسلم أيدك وفيفا شرقية

Nada said...

بجد روعه ان موضوع زى ده ييجى على بالك كتير فاكرين ان الزقازيق دى عبارة عن مجموعه من الفلاحين عايشين فى بيوت بالطوب النى نفسى كل الناس تشوف مدونتك دى وتعرف ان الزقازيق مش قليله بس لحد ما برده