اسحبلك كارت.. الكلام بفلوس... ومواضيع اخرى

سلامو عليكووووووو
بدات حاله الطوارئ القصوى المسماه قديما بالامتحانات..الحمد لله خلصنا كوميونيتى اخيرا..وهنخش ع الرمد اهو.. وربنا ييستر

عجبنى اوى النظام الجديد فى الشفوى.. تخش للدكتور وتسحب كارت من مجموعه كروت قدامه.. وتجاوب الاسئله الموجوده فيه..ابتكار يا جماعه

مع طب الزقازيق.. ابداع بلا حدود

انا حاسس انه شويه وهنمعلها بلاك جاك.. وبصره يا دكتور.. ولو جالك كارت صعب شويه.. يقش بقيت الكروت

المفروض كمان كام سنه نعمل الشفوى بالفيديو كول .. والدقيقه بنص التمن..او مثلا ابعت اس ام اس فيها كلمه اسئلنى شكرا.. والسوال يجيلك فى رساله.. ابعت اكتر تاخد درجات اكتر

طب الزقازيق.. مزايا الخط وممزيات الكارت

الكلام بقا بفلوووووووووووووووووس.. تخيلو.. اه والله الكلام بقا بفلوس

فى الفتره ما قبل دعك الكوميونيتى.. فرد من العيله نزل راح يسئل عن شويه حاجات فى التليفونات

تخيلو قالولو ايه.. روح الاول خد وصل استفسار ب 8 جنيه..قلنا مش مشكله

نفس البنى ادم راح للمعاشات ولقى ان فيه فلوس ناقصاله.. راح يسئل ليه..قاله الموظف مش هجاوب الا بعد ما تدفع وصل بجنيه..بناءا على التعليمات الجديده.. الاسئله عليها ضرايب..يعنى الكلام بقا بفلوس..

البيوت بقا عليها فلوس.. والكلام بقا بفلوس.. شويه شويه هيبقا الهوا بفلوس.. وعمار يا مصر

جالى تاج من الصديقه العزيزه جدا عزيزه دسوقى.. سورى.. قصدى منى من مدونه ماى هوب

كالاتى

1هواياتي

الكوره.. النت..العربياااااااااااااااااااااااااااات..والقرايه.. وتعلم المزيد فى الانجليزى

2اشهر عيوبي

تقريبا انا كلى عيوب.. بس اللى اعرفه انى ممكن اتعصب جامد..وانى كسلى شويه.. شويتين.. تلاته

3حاجات بكرها جدا

الفشل.. رغم انى فاشل.. وان اصحابى يخونو ثقتى فيهم لاى سبب..وكليه الطب

4حاجات بحبها قوي ومش بمل من تكرارها

انى اغلب اصحابى فى البلاى ستيشن.. متعه ما بعدها متعه..بحب اتفرج على برنامج توب جير

انا حفظت كل حلقاته تقريبا..

بحب القرايه جدا جدا

5سؤال بيستفزني

انت ليه شكلك كده.. انت هتصلع؟؟

واى سوال تانى ينم عن الغباء الغبى

هذا خلق الله.. ارونى ماذا خلق الذين من دونه

6امنيتي في الحياة

اعيش حياه سعيده حلوه.. اسافر برا و اعيش لفتره هناك انمى فيها شويه حاجات انا بحبها

وفيه حاجات طبعا تانيه.. بس خصوصيات

7حاجات مؤمن بيها جدا

ربنا ما بيضعش مجهود حد..

خيرها فى غيرها.. مش لازم الحاجه اللى معرفناش نحققها تكون هيا الخير لينا.. الله اعلم

8اكتر حاجة فاشل فيها

الكليه.. وحياتى عموما.. انا مش راضى عنها

9وظيفة بحبها

test driver

10 مثلي الاعلي في الحياة

طبعا اتمنى انى اقتدى بالرسول صلى الله عليه وسلم فى كل جوانب الحياه

وباخد اى حد ناجح كؤمشر لحياتى ونجاحى وفشلى

بهدي التاج

اللى عايزه ياخده.. انا هحوشه يعنى

بس ممكن نقول... فتافيت كلام

اهو اى كلام

تو بى ايه هيومان

ـــــ

مبرووووك ليكم..

مبروك لعطوف حبيبى هارتى وعمر باشا زميل الكفاح على انهم اتخرجو خلاص وبقم عاطلين اد الدنيا كلها

عاطف.. اتمنى ان مخك يكبر وتشيل مسئوليه حد تانى غير نفسك بس..

عمر.. خليك واسطتنا يلا وما تستندلش.

اما باقى الشله الفاسده.. فلا عزاء لهم.. كلنا فى الهوا سوا.. لسه طلاب .. وربنا يسترها علينا

الثانويه العامه

بس خلاص

البريزينتيشن بتااااااااااااااااااعى

الحمد لله... اخيرا وبعد عذاب شهر ونص وخناقات مالهاش اول من اخر.. خلصنا البريزينتشين بتاعنا(بتاع الكوميونيتى..الصحه العامه و طب المجتمع يعنى).. وعرضناه

كان المفروض عرضه يوم التلات 27 \ 5 بس للاسف الجهازين اللى كانو معانا باظو.. واحد علق .. والتانى محطش منطق.. شوفتو النحس ورئيسه القسم زعلت ومشيت.. وكانت ليله.. بس الحمد لله وافقت انها تدينا فرصه تانيه

وقدرنا بعون الله نعرضه يوم الخميس 29 \ 5 بعد امتحان الراوند

كانت فكرتنا اننا نعمل زى تقرير او بيان عن حرب بين القوات الطبيه المصريه والامراض والمشاكل الصحيه اللى كانت فى القريه اللى نزلناها.. اينعم التنفيذ كان ناقصه كتير.. زى اللبس و الاعداد الكويس.. بس احنا علمنا اللى نقدر عليه.. وكمان فكرتنا كانت جديده ومش محروقه ولا انعملت قبل كده.. كان ممكن نطلعها احسن من كده..بس وقتنا وامكانيتنا ما سمحتش الا بده.. بس الحمد لله انه نال اعجاب عدد كويس من زمايلنا.. وعجب دكتوره ساره المشرفه علينا

الحمد لله عجب ناس كتير.. هو اينعم مكنش بالجوده او الكوميديا اللى كانت فى بريزيتشين ابص باشا.. بس اهى حاجه على قدنا

انا رفعت التتر وشويه غلطات مشاهد(الميكينج يعنى) لما كنا بنصوروكمان شويه صورلينا من القريه العجيبه اللى مفيهاش بنى ادمين اللى نزلناها..ولما اعرف اجيب بقيت البتاع هبقا ارفعه ع البوست ده..

THE VILLAGE....

انا اللى على اليمين.. اللى لابس قميص ابيض مشجر

THE MAKING.....

ده انا.. القائد الميدانى للقوات الطبيه..خخخخخخخ

THE TITRE

وده بقا فيديو التتر اللى عملناه عشان يطلع فى اخر البريزينتشين بتاعنا.. فيه شويه غلطات مشاهد وحاجات تانيه صورناها مخصوص عشان التتر.. اتمنى انه يكون حلو

احب اشكر على قرقر باشا على مجهوده الكبير فى شغل الكمبيوتر.. الراجل عمل باور بوينت تحفه.. واشتغل كتير فى الفيديهوات قص وتحويل ولزق وحاجات كتير.. ويكفى انه مبدع التتر.. بس عيبك يا على انك يا راجل عصبتنا عشان تخلص الحاجه.. وبلاش والنبى جنون العظمه اللى راكب اهلك ده..اديك شفت جروب ابص بالهداوه خلصه شغلهم تمام..انت عملتلنا حدوته وذليت انفاسنا ولا ما يكون بيل جيتس اللى بيشتغل معانا..بس مايمنعش برضه انى اشكرك على شغلك الجبار ده.. واتمنالك التوفيق فى مشروعاتك كديزاينر محترف

كمان بشكر دكتوره ساره على تعبها معانا ومساندتها لينا .. بجد معرفش ازاى استحملتنا طول السنه سيمينار وراوند كمان..واحنا معروفين بالشقاوه والارهاب

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

ع الهامش.. النهارده بدانا امتحانات الفاينل.. كان عندى امتحان عملى شرعى وسموم.. الحمد لله الامتحان كان حلو وحليت لووز.. رغم الغلطه العجيبه اللى عندى.. بس الحمد لله

ربنا يسترها معانا فى الباقى..هنبدا 15\6 نظرى كوميونيتى..وهنخلص امتحانات على يوم 1\8..دعاوتكو معانا